Ieu maitot !!!!

Veiquí 'na p'ita nhòrla extracha d'una emission de Valentin Degorce sus Confolens FM en 1986 e dicha per Mme Antoinette Touchet. Quò se passa a la feira de Confolent (en Charanta occitana). Quand lo desir se boira a la paur... Afe, qu'es entau que comprene 'quela istòria !!

Un pauc de pub per un grope de ska de Chartres (emai a l'entorn) ente juega lo cosin de ma mia : la Fanfa Skali (la Fanfa per los intimes). Lo cosin fai lo trombòne. Te perpause 'na p'ita video per lo descubrir. Bon, qu'es un pauc a la Mozinor lor video. Tu pòdes 'nar maitot sur lor Myspace.

'Na p'ita video d'un grope nissart qu'aime plan. Bon, de segur, Nux Vomica, qu'es pas de la granda musica nimai lo melhor dau ragga , mas son plan festius, an daus textes risoliers... E aprep la plueja lionesa d'aüei, quò fai pas de mau un pauc de solelh provençau !

La setmana passada, fuguei au concert dau Duo Gansch – Breinschmid a Limòtges. Un duò trompeta-contrabassa daus bons. 'Na musica jazzy, vienesa mais balcanica mas subretot daus musicians franc fadards ! Qu'era geniau !

Thomas Gansch nos aprenguei 'n'expression de chas se, dins son dialecte alemand d'Àustria : i schiff an Igl mit Dauerwelln. Qu'es 'n'expression d'utilizar quand tu ses susprés, estonat coma quand tu veses las p... euh... los pès de Melania per lo prumier còp, lo darrier chamison MXL87 o la darriera creacion de l'OCLC. La revirada en anglés facha per Georg Breinschmid es : I pee a hedgehog with longlasting waves. Quò balha en occitan : pisse un eiriçon emb una permanenta. Oc-es. Qu'es delicat, rafinat. Son entau los Vienés ! Ne'n fagueren 'na chançon, e vei-la-quí !

Crese que me la vau gardar 'quela expression. « Fuec de Diu ! Sei 'nat a un concert, ier, a ne'n pissar un eiriçon emb un permanenta ! » Qu'es çò qu'auriá pogut dire Coincoin, la canetona lemosina auboissaira, qu'es 'nat veire lo concert dau Mnozil Brass, ente juega Gansch (de legir son rendut-compte sus son blògue).

Veiqui la darriera video d'un daus melhors gropes occitans d'aüei : Mauresca Fracas Dub. Un boiradís culinari mai lingüistic (culturau, que) sus un son raggadub. Bon apetís !

En Lemosin, quand quauqua-ren s'eterniza, disem "quò fai lo conte dau merle e de la merlata". Lo Jan dau Melhau nos explica perque en tut nos contar queu conte. En occitan mai en frances, d'una lenga l'autra.

Vòle far un pauc de pub per un amic meu. Eu creet un webradio l'an passat : Jazz Clazzic. 'Na radio que passa nonmas dau swing, dau gospel mai dau blues. Mas, laisse Michel vos presentar sa radio.

Dempuei quauques jorns, avem, sus los panenus de Molins, la publicitat de 'na novela bevencha : l'Auvergnat Cola. Bon qu'es un cola, coma sembla au Pepsi e tròbe pas la genciana dedins... Disen que ne'n i a mas bon... Çò qu'es plasent es de veire en gròssas letras de l'occitan sus 'queu paneu. Perque l'eslogan de 'quela marca es : Fai tot petar miladiu ! E que s'auva maitot dins la pub per la tele !

En tut me permenar sus Lastfm , ai fach 'na descuberta de las bravas. Daus trobadors d'acier ! Nos venen d'Itàlia, de la famosas valadas occitanas. E... aime pas dau tot ! Mas, coma sei un garçon plan gente, e que quò plairá a mas legidoras, vos los presente. De qualas legidoras vòle parlar ? Mas de las fòrça simpaticas dròllas de l'Occitan Leopard Crew. De las dròllas que cosen, que bròchen, que bròden e... qu'escoten dau punk rock !!!

Veiqui dròllas ! Per v'autras ! 'Na video dau Quinse, los trobadors d'acier de las valadas ! E per telecharjar a gratis lor darrier (e benleu prumier) disc es aquí !!

Dissabdes, fuguei a la dictada occitana, coma beucòp de monde en Occitània mai en los País Catalans. Era la prumiera a Limòtges. Avem 'gut un texte de Roland Berland, un autor lemosin que me platz beucòp. Veiquí 'na pita video de França 3 Lemosin a perpaus de quel eveniment (los qu'an de bons uelhs nos poden veire, lo Tiston mai me).

A la fin de la dictada, chascun aguet un brave diplòma de participacion que se 'chaba entau : "Au nom de l'amistat entre nòstres país e per l'amor de nòstras lengas, li balham lo titol de Ciutadan d'Onor d'Occitània e de Catalonha." Oc-es, sei ciutadan d'onor !!! Sabe pas si quò permet de passar de las vacanças a gratis sus las costas catalanas...