Ieu maitot !!!!

Coma fòrça monde, serai a Carcassona dissabde que ven (oc-es qu'es deman...).

Char lector, benleu nos l'i veirem ! Per me coneisser qu'es plan simple : parle lemosin, sembla, segon ton passiu culturau a Asterix, José Bové o un tipe dau Village People (subretot emb lo casque de chantier, mas l'aurai pas, trabalhe pas las dimenjadas !!), portarai un brave chamison Arri ! roge jos mon pull.

Serai dins lo cortègi de Gardarem la Tèrra emb la fanfara daus Goulamas'K (e benleu un pauc emb la delegacion lemosina e 'nirai veire los pitits de Libertat). Serai coma la Clara de segur (si 'la part pas coma un daus musicians dau Goulamas'K, lo trompetaire/acordeonista per exemple...).

Me trobarà a la fin de la manifestacion a un taulhier d'un productor occitan a chantar "Anem Òc, per la biera occitana" o a lo de MXL87 (l'ai totjorn pas lo chamison banturle !!). E de ser, espere anar a Villagalhenc (char lector si t'as 'na veitura emb doas plaças voidas e que tòrna a Carcassona aprep la festa a Villagalhenc, vòle plan l'i 'nar coma te !!!)

(per los qu'aniran sus lo site d'Arri !, n'i a 'na fotò d'un tipe en chamison Arri ! roge... qu'es me...)

'Na p'ita ficha facha par un amic... De tot biais, sei pas segur que
lo Jaurés plai aus militants dau FN !!! Son assassin benleu...

Legit sus lo blòg de Melania : Solidaritat emb los escolans de la Valadas occitanas d'Itàlia !!!

La posicion del Govèrn italian sus lhi contenguts de la reforma de l’escòla:

“Degun trucharè las pichotas escòlas de montanha, fòra que aquelas ambe menc de 50 escolars”.

La posicion de Lido Riba, President de L’UNCEM Piemont (Union Comunitats de Montanha dal Piemont):

“Lhi a 41 escòlas de montanha ambe menc de 12 escolars, que serèn destinaas a despareisser!!”

La posicion de Mercede Bresso (Presidènta Region Piemont) e de l’Assessora Regionala a l’istruccion Gianna Pentenero:

“Dins lo periòde brèu las escòlas de montanha serèn resparmiaa, mas après, ambe l’aplicacion del plan operatiu complèt, lhi aurè 180 Comunas piemontesas de montanha que perderen l’escòla maternala o elementara”

Fin finala, l’operacion portaré a la clausura de 220 escòlas de montanha sus las 260 que existon ara.

L’atac de la ministra Gelmini a l’escòla publica e, en particolar, a l’escòla de montanha es ben grèu. En aquest moment dificil per tota l’escòla italiana, mas sobretot per l’escòlas occitanas de las Valadas, chal far auvir nòstra vòutz, , per defendre la cultura e la civiltat alpina.

Lo 30 d’otobre tuchi a Coni a 9 oras dal matin en Plaça Europa ambe cartèls en lenga nòstra, nòstras bandieras e nòstra musica!!

Veiquí lo clip de la chançon "Stereotype" daus Maurescas. Un pauc estatic per un grope de ragga... Mas, las paraulas son de las bonas !!!

Alain Dorange, dalhaire volontari d'OGM, condamnat en 2006 per un dalhatge e perseguit per aver refusat un prelevament d'ADN a la seguda de 'queu jutjament, fuguet condamnat a 'n'esmenda de 50€ per lo tribunau correcionau de Limòtges le 20 de juhn passat. De consent coma son avocat mai son comitat de sosten, decidiguet de pas 'nar en apelada. Pertant, la justicia li pausa un autre rendetz-vos : coma d'autres dalhaires, es persegut per Monsanto per associacion de maufactor.

Sorça : Le Courrier de la Baleine n°155 (de surtir)

La femna qu'aima l'òme avant lo maridatge
Porte atteinte à l'identité nationale

L'òme qu'aima l'òme estrangier
Porte atteinte à l'identité nationale

L'òme que parla la lenga de son pair mai dau pair de son pair
Porte atteinte à l'identité nationale

Blu blanc roge
Nòstras vitas saulhan lo drapeu de l'identité nationale

Mas nòstre drapeu es roge dau sang daus oprimats
Mas nòstre drapeu es negre de nòstras coleras

Quand era pitit, fasiá de l'asma. Bon, ne'n fau totjorn mas mens. Lo medecin disset a mos pairs : "Lo fau mandar dins las Pirineus". Entau, a cinc ans, deguei passar l'estiu en Catalonha Nòrd, mai precisament a La Guingueta d'Ix (Bourg-Madame en francés) en Cerdanha, sens mos pairs dins un institut especializat dins las malaudias respiratorias daus mainatges. L'i tornarai quatre estius. L'i aprenguei a far dau veló. Prenián lo petit train jaune aus colors catalanas per 'nar nos permenar a Oceja o alhors. Ne'n ai tot plen de suvenirs, dau solelh de julhet mai daus auratges dau mes d'aust, daus juecs mai de la quine respiratoria... La Guingeta d'Ix es pas plan granda mas rasis i a 'na vila : Puigcerdà. Entre los dos, lo Segre.

Lo Segre es una de las frontieras naturalas de França. "Naturala" vòu dire que te fau molhar los pès per passar de l'autre costat. Ren mai. Perque, a cinc ans, comprenguei que las frontieras son pas naturalas dau tot ! L'autre costat era lo país de ma granda (murciana) mai de mon reir-oncle (barcelonés). Mas era l'autre costat. I aviá 'na brava gendarmariá rasis lo pitit pont per passar lo Segre e 'nar a Puigcerdà. Mai daus gardas civius. Sus un pont tant pitit. Coma si òm voliá pas que tu passes. Vesiá pas la diferéncia entre lo monde de 'queu costat e 'queu de l'autre. Eran catalans dau dos costat. Qu'era la Cerdanha dau dos costat. E perque tan de gendarmas a l'entrada dau país de ma granda ? Avián pas lo drech de l'i 'nar ?

Lo parc de l'institut se trobava lo long dau Segre. Aviá l'autre costat en fàcia de me tot lo temps. Perque pas traversar lo riu ? Podiá pas zo far perque lo parc era encerclat per un grilhatge. 'Laidonc, lançave daus pitits calhaus, loenh, loenh, per fin que tombessan de l'autre costat. Tot plen de pitits calhaus passeren la frontiera coma 'quò e la gendarmariá mai la garda civila jamai zo saugueren.

Frédéric Minvielle voliá esser francés mai neerlandés. Deu rendre son passapòrt mai sa carta d'identitat perque la França reconeis pas son maridatge emb un òme neerlandés.

Sabiá qu'aquò se fasiá per las femnas, mas, i a longtemps... Ne'n i a de las istòrias entau, dins ma familha, de femnas maridadas a daus espanòus que perden lor nacionalitat francesa mai daus mainatges que podian pas aver la nacionalitat dau pair (republican espanhòu exilat en França) ni de la mair francesa... Enfin, cresiá qu'era avant...

Non. La França a pas chamnhat. Pas mai de nacionalitat francesa (e subretot pas mai de drechs civics que van emb la nacionalitat) per los que van coma l'estrangier... Mariane lors ditz : Quò se fai pas de se maridar coma un autre òme ! Defòra de nòstra bela nacion eterosexuala !

L'identitat nacionala seriá eterosexuala ? Faudriá demandar au ministèri...

Arser fuguei a un concert de Rocé. coneissiá 'queu tipe. L'i sei 'nat perque invitava Archie Shepp. Descrubei un slamaire, coma òm ditz uei. Mas faudriá pas dire 'quò, perque Rocé vòu pas esser embarrat dins 'na casa, coma dins un magazin de discs. Per ieu, qu'es dau hiph op, l'esséncia dau hiphop : 'na votz, 'na platina, daus textes. I aviá tanben 'na contrabassa electrica mai lo sax d'Archie Shepp. Experimentacion musicala, boiradís entre free jazz e slam. E daus textes. Poetics, militants. Sus l'art, l'identitat, sus 'quela França que respecta pas nòstras culturas. E lo sax d'Archie Shepp. Un son, coma un present per tas aurelhas. Quauquarren de magic.

Dempuei quauques jorns, dempuei son ospitalizacion, esperave sa mòrt. Aüei, sei triste. Avem perdut Aimé Césaire, un pensador daus grands. Lo descrubiguei quand era collegian, a la desvirada d'una explicacion de texte.

" (...) Au bout du petit matin, au-delà de mon père, de ma mère, la case gerçant d'ampoules, comme un pêcher tourmenté de la cloque, et la toit aminci, rapiécé de morceaux de bidon de pétrole, et ça fait des marais de rouillure dans la pâte grise sordide empuantie de la paille, et quand le vent siffle, ces disparates font bizarre le bruit, comme un crépitement de friture d'abord, puis comme un tison que l'on plonge dans l'eau avec la fumée des brindilles qui s'envole... Et le lit de planches d'où s'est levée ma race, tout entière ma race de ce lit de planches, avec ses pattes de caisses de Kérosine, comme s'il avait l'éléphantiasis le lit, et sa peau de cabri, et ses feuilles de banane séchées, et ses haillons, une nostalgie de matelas le lit de ma grand-mère (...) "

Fuguei frapat per la fòrça de sa poesia, de sos mots, de la credada de revòlta de chade frasa. Mai grand, legiguei 'queu Cahier d'un retour au pays natal en entier. Mai la Tragédie du Roi Christophe. Mai son Discours sur le colonialisme. Un discors essenciau per la dignitat. La dignitat dau pòple negre de segur, mas la dignitat de l'umanitat entiera subretot. Contra la barbaria. Trobar l'uman darrier nòstra diversitat. L'universau se tròba pas dins l'uniformizacion, l'assimilacion, dins 'n'identitat nacionala fabricada dins un ministèri, l'universau es çò qu'avem en comun, n'autres umans, tant dins la negrituda de Césaire coma dins nòstra occitanitat o catalanitat, dins nòstra identitat.