Ieu maitot !!!!

Tòrne de mas vacanças au País Basc. Un plan brave país, un retorn a la terra daus aujòus mairaus qu'eran dau Labord. 'Na terra plan descomplexada de sa lenga mai de sa cultura. 'Quela setmana, i a 'gut un acòrd entre Seaska e l'Educacion Nacionala : onze regents de mai per las ikastolak. Normau. N'i ne'n a quasi una per vilatge. E lo monde parlen basc dins las ruas, au subremerchat, au restaurant, … 'Laidonc, lo bilingüisme seriá possible en territòri jacobin ? Oc-es. Emb daus braves panues bilingües. Perque pas en cò nòstre ? Mas faudrá èsser tenace, perserverant... e parlar occitan, tot lo temps. Te, legidor, que me coneis dins la vita vertadiera, me parle pus en frances ! Benleu, nos faudrá nos forçar per zo far. Mas, los basques zo fan. E sem pas mai (ni mens) colhons qu'ilhs !!

Veiquí un pitit strip en occitan que lo Laurenç a fach per la Darboneta mai me... M'a plan far rire !!!!!!!!! Mas aura, me mesfiarai de las audencas mai de la Darboneta !!!!!!!!!

A Sant-Marcèl, las filhas polidas an pas de pel a l’uèlh...

Dins l'editoriau de la Setmana n°696, l'Andriu de Gavaudan nos balhet sa vuda sus los blògs occitans. Li voldriá rendre responsa perque lo trobei un pauc dur coma n'autres. Eu nos disset que mai d'un blòg occitan se barra dins sa p'ita nacion e nos tòrna vers l'eidéia de l'existéncia de las lengas d'òc.

Qu'es benleu lo cas de quauques blògs gascons. Quò mostra lo dinamisme dau mitan gasconista sus l'Internet. Veirem ben la quala de las doas opcions serà mai eficaça per la lenga e la cultura nòstras. Demai, beucòp de blògs aranes son virats vers l'Aran, la Catalonha mai l'Espanha sens sentiment panoccitan. Quò mostra que los aranes an benleu pas d'enguera consciéncia de lor apertenéncia ad un 'nivers culturau mai grand que lor vau. Quò me pareis normau perque Occitània es pas pro fòrta nimai presenta en Euròpa per los permetre de s'identificar ad ela. Quela identificacion a sa p'ita nacion, a son dialecte, la vese pas per d'autras regions occitanas. Los blògs lemosins, lengadocians o provençaus que coneisse son pas entau.

Eu nos disset tanben que los blogaires qu'aprenen la lenga van tròp regde. Quatre mots d'occitans lor son sufisents per far un blòg. Emai apòrten pas grand chausa, enoncien pas d'eidéia. De segur. Mas los blògs occitans son coma los dins las autras lengas dau monde : sierven d'en prumier de liam sociau dins 'na societat fòrça individualista. Son lo mejan d'expression daus dròlles dau monde per parlar d'amistat, d'amor, de ren d'important per los beus. Quantben de fòtos emb lo comentari « Té tro belle ma chéri, j'te kiffe grave !!!! » Coma los beus, trobem lo jornau intime public. La terapiá de grope virtuala. Qu'es quò l'essenciau daus blògs. N'i a tanben los blògs politics, propagandistas, de pensaments sus lo monde. N'i a pas tant. Los blògs coma los dau Bloguitge son entau. Mas an 'na caracteristica mai. Son suvent escrichs per de monde que mestrejen pas la lenga. Perque ? Perque aprener 'na lenga implica son usança e que l'Internet es un dau melhor mejan per trobar un interlocutor. La lenga d'òc es mens clandestina sus lo web que dins la vita vitanta. Abitant de Limòtges, utilize mai l'occitan sus Internet que non pas dins ma vita quotidiana. Qu'es pas 'cepte de parlar occitan dins lo quite mitan occitanista.

De segur, la lenga d'un aprenaire es pas perfacha. Nos fau corregir. Mas lo monde que coneisse, lo monde dau Bloguitge, son dau monde onestes, qu'an la volontat d'aprener la lenga per la far viure. Fau prener 'quilhs blògs coma un otis pedagogic, per de la gent qu'an pas beucòp d'autres mejans per utilizar los occitan.

Dissabdes, fuguei a la dictada occitana, coma beucòp de monde en Occitània mai en los País Catalans. Era la prumiera a Limòtges. Avem 'gut un texte de Roland Berland, un autor lemosin que me platz beucòp. Veiquí 'na pita video de França 3 Lemosin a perpaus de quel eveniment (los qu'an de bons uelhs nos poden veire, lo Tiston mai me).

A la fin de la dictada, chascun aguet un brave diplòma de participacion que se 'chaba entau : "Au nom de l'amistat entre nòstres país e per l'amor de nòstras lengas, li balham lo titol de Ciutadan d'Onor d'Occitània e de Catalonha." Oc-es, sei ciutadan d'onor !!! Sabe pas si quò permet de passar de las vacanças a gratis sus las costas catalanas...

Legit sus lo blòg de Melania : Solidaritat emb los escolans de la Valadas occitanas d'Itàlia !!!

La posicion del Govèrn italian sus lhi contenguts de la reforma de l’escòla:

“Degun trucharè las pichotas escòlas de montanha, fòra que aquelas ambe menc de 50 escolars”.

La posicion de Lido Riba, President de L’UNCEM Piemont (Union Comunitats de Montanha dal Piemont):

“Lhi a 41 escòlas de montanha ambe menc de 12 escolars, que serèn destinaas a despareisser!!”

La posicion de Mercede Bresso (Presidènta Region Piemont) e de l’Assessora Regionala a l’istruccion Gianna Pentenero:

“Dins lo periòde brèu las escòlas de montanha serèn resparmiaa, mas après, ambe l’aplicacion del plan operatiu complèt, lhi aurè 180 Comunas piemontesas de montanha que perderen l’escòla maternala o elementara”

Fin finala, l’operacion portaré a la clausura de 220 escòlas de montanha sus las 260 que existon ara.

L’atac de la ministra Gelmini a l’escòla publica e, en particolar, a l’escòla de montanha es ben grèu. En aquest moment dificil per tota l’escòla italiana, mas sobretot per l’escòlas occitanas de las Valadas, chal far auvir nòstra vòutz, , per defendre la cultura e la civiltat alpina.

Lo 30 d’otobre tuchi a Coni a 9 oras dal matin en Plaça Europa ambe cartèls en lenga nòstra, nòstras bandieras e nòstra musica!!

N'i a quauquas setmanas, trobei un pitit libre sus lo taulier d'un editor audenc. Boris le babylonien contre l'Aligot Littéraire. La remembrença de l'aligòt minjat a l'Estivada 'queste estiu me faguet salivar. Virei lo libre per ne'n legir lo darrier. Un extrach. Dau ritme, de l'umor. Mas pas d'aligòt. L'autor, un jòune, coma me. Fuguet chaumaire. Coma me. Dreibei lo libre. Quauques mots d'occitan. Revirats en frances. Beucòp de frances. Daus còps revirats en òc. Un pitit glossari plan interessant. Mas totjorn pas d'aligòt !! Lo voliá trobar. 'Chaptei lo libre. Lo comencei de legir.

Un jòune autor occitan monta a París per trobar Boris, un exilhat, e li presentar un project fadard. Un Oulipo occitan : l'Aligòt Literari. « Qu'es aquò qu'aqueste aligòt ? L'Aligot Littéraire est une invention issue d'un concept très technique. Celui-ci mêle à une évolution linguistique une avancée poétique, entraînées et jugulées par des progrès éthyliques étonnants, ceci en simple application d'un process au marc de raisin fondu et, ce qui est vraiment nouveau : avec une pointe de gras ! » Vei-lo-quí ! L'aviá trobat mon aligòt !

Un occitan perdut dins la jungla literària parisenca, entre vodcà lituaniana, parpalh d'òtessas plan tetonadas, reviscoladors de la Gàllia Narbonesa e un exilhat aparisencat, que passa a la television e que tot lo monde tròban très beau. 'Na critica dau monde literari en França. Mas 'na critica facha dempuei Occitània. Emb una occitanitat sens complexe. Un libre qu'es, segurament, de l'aligòt literari, emb sa pointe de gras, e benleu un pauc autobiografic...

Julien Campredon, Boris le babylonien contre l'Aligot Littéraire, Atelier du Gué, Villelongue d'Aude, 2006.

Lo site de l'editor : http://www.atelierdugue.com

Lo dissabdes 4 d'octòbre, i a 'na serada occitana dins un bar de Limòtges. Veiquí la presentacion de 'quel eveniment.

Avez-vous déjà commandé votre bière ... en occitan ? Connaissez-vous les ficelles de la drague de comptoir ... en occitan ? Et des familiarités de fin de soirée ... en occitan ... vous en connaissez ?

Arri!, collectif de jeunes occitanistes limousins, vous propose de découvrir son nouveau dépliant : "Lo cafè en occitan" à l'occasion d'une grande soirée festive le samedi 4 octobre à partir de 20h30 au bar L'Amicale des Parachutistes Belges, rue Charles Michels à Limoges.

Après cette soirée, n'en doutez pas, vous serez incollables ! Vous saurez dire "adiu !" (salut), "mercés ben !" (merci beaucoup) mais aussi "Ses ben minhard(a)" (T'es mignon-ne) et bien d'autres choses encore !
Et pour faire passer le tout, spécial music mix occitan, concert acoustique, bonne bière et autres surprises seront au rendez-vous.

Au plaser de vos veire !

Avec le soutien de la Libraria occitana, la Cerva d'Oc, MXL87 et Bolega-te!, l'émission occitane de Beaub'FM.
Renseignements : arrilemosin@free.fr et le site d'Arri !

Questa nuech, decidei de crear un malhum de blògs occitans, un pauc coma lo malhum daus freemen : chade blogaire bota la lista daus autres sus son blòg. Entau los cerchadors coma Google o los sites coma Tecnorati te fan montar dins lor classament. Quò faria mai de buzz occitan sus lo web. Emai quò nos permetra de coneisser d'autres blogaires occitan.

Trobei un nom : lo Bloguitge. Los felibres an lo Felibritge, los blogaires auran lo Bloguitge. Bon, sei de consent, lo nom es purit. Char lector, si t'as 'n'idéia melhor, balha-me-la !!!

Ecriguei 'na charta :

1) Volem defendre e difusir la lenga occitana en l'utilizar sus l'Internet per parlar de tot.
2) Volem participar a la construccion de la civilizacion occitana, eiretiera daus trobadors, dau Felibritge e de la cultura populara per portar a la civilizacion umana mondiala nòstra votz, nòstra vesença originala.

Zo sabe, fai pensar a dau Felix-Marcel Castan. Pertant, questa nuech, beguei pas ren, fumei pas ren.

Per participar au malhum, fau esser de consent emb la charta, zo dire sus son blòg, botar tos los liams daus autres e se marcar (perque los autres te boten sus lor blòg). Òm se marca 'quí : Malhum de blògs occitans.

Per lo moment, nos sem dos. Qu'es pas mau, lo Bloguitge exista mas dempuei quauquas minutas...

Veiqui los blogaires dau Bloguitge :

Ieu maitot
lo parpalhon vagamond

Veiqui un reportatge d'Infòc (Barcelona TV) sus la constitucion d'una academia per la lenga occitana. En esperar que nòstres academicians siran mens colhons que los frances... enfin, quò deuriá esser plan 'cepte, la França a los academicians los mai colhons dau monde !!!!

Aüei, lo 21 de belier 2008, es la jornada internacionala de la lenga mairala. Ieu parle lo frances. Magalí parla l'occitan. Ma granda l'espanhòu. Lo pitit Raphael, franco-austrian de dos ans te respond en alemand, dialècte austrian bas, quand tu li parlas en frances. Mas, per dire medrescoderza, coneis nonmas lo mot en frances.

96% de las lengas son parladas per 4% de la populacion mondiala. 4% de la populacion mondiala ten 96% de la diversitat umana. Benleu, ne'n fas tu partida. 'Laidonc, aüei, fai la viure 'quela diversitat. Mai deman. Mai passat-deman. Te 'restas pas !