Ieu maitot !!!!

Coma fòrça monde, serai a Carcassona dissabde que ven (oc-es qu'es deman...).

Char lector, benleu nos l'i veirem ! Per me coneisser qu'es plan simple : parle lemosin, sembla, segon ton passiu culturau a Asterix, José Bové o un tipe dau Village People (subretot emb lo casque de chantier, mas l'aurai pas, trabalhe pas las dimenjadas !!), portarai un brave chamison Arri ! roge jos mon pull.

Serai dins lo cortègi de Gardarem la Tèrra emb la fanfara daus Goulamas'K (e benleu un pauc emb la delegacion lemosina e 'nirai veire los pitits de Libertat). Serai coma la Clara de segur (si 'la part pas coma un daus musicians dau Goulamas'K, lo trompetaire/acordeonista per exemple...).

Me trobarà a la fin de la manifestacion a un taulhier d'un productor occitan a chantar "Anem Òc, per la biera occitana" o a lo de MXL87 (l'ai totjorn pas lo chamison banturle !!). E de ser, espere anar a Villagalhenc (char lector si t'as 'na veitura emb doas plaças voidas e que tòrna a Carcassona aprep la festa a Villagalhenc, vòle plan l'i 'nar coma te !!!)

(per los qu'aniran sus lo site d'Arri !, n'i a 'na fotò d'un tipe en chamison Arri ! roge... qu'es me...)

Trauchant la nuech, Super-Occitan, lo famós subre-eròs, tornet aparéisser dins un cafè limotjaud dissabde de ser. Defendent la lenga mespresada, Super-Occitan era vengut liberar Limòtges dau carcan franchimand per lo bilingüisme sinhaletic ! L'unica fòto dau subre-eròs fuguet presa per 'na jòuna femna tota desvirada.

'Ribant ni de çai, ni de lai, fugissent ne sai ente, Super-occitan es lo mistèri mager d'Occitània. Mas qui es Super-Occitan ? D'ente ven ? Serà a Carcassona ? Degun iò pòt dire...

Lo dissabde 3 d'octòbre 2009 a 21:00, Arri! te convida a 'na novela serada sus lo tema "Limòtges en occitan" au cafè L'Amicale des Parachutistes Belges, rua Charles Michels, a Limòtges.

'Quela serada marcarà la debuta d'una campanha per la sinhalizacion bilingüa Occitan/Francés dins la vila de Limòtges.

Quò sirà l'enchaison de bringar a l'occitana, en musica, de saborar de quauquas especialitats d'aquí, e d'aprener quauques mots dins la linga dau país.

La setmana passada, fuguei au concert dau Duo Gansch – Breinschmid a Limòtges. Un duò trompeta-contrabassa daus bons. 'Na musica jazzy, vienesa mais balcanica mas subretot daus musicians franc fadards ! Qu'era geniau !

Thomas Gansch nos aprenguei 'n'expression de chas se, dins son dialecte alemand d'Àustria : i schiff an Igl mit Dauerwelln. Qu'es 'n'expression d'utilizar quand tu ses susprés, estonat coma quand tu veses las p... euh... los pès de Melania per lo prumier còp, lo darrier chamison MXL87 o la darriera creacion de l'OCLC. La revirada en anglés facha per Georg Breinschmid es : I pee a hedgehog with longlasting waves. Quò balha en occitan : pisse un eiriçon emb una permanenta. Oc-es. Qu'es delicat, rafinat. Son entau los Vienés ! Ne'n fagueren 'na chançon, e vei-la-quí !

Crese que me la vau gardar 'quela expression. « Fuec de Diu ! Sei 'nat a un concert, ier, a ne'n pissar un eiriçon emb un permanenta ! » Qu'es çò qu'auriá pogut dire Coincoin, la canetona lemosina auboissaira, qu'es 'nat veire lo concert dau Mnozil Brass, ente juega Gansch (de legir son rendut-compte sus son blògue).

En Lemosin, quand quauqua-ren s'eterniza, disem "quò fai lo conte dau merle e de la merlata". Lo Jan dau Melhau nos explica perque en tut nos contar queu conte. En occitan mai en frances, d'una lenga l'autra.

Dempuei quauques jorns, avem, sus los panenus de Molins, la publicitat de 'na novela bevencha : l'Auvergnat Cola. Bon qu'es un cola, coma sembla au Pepsi e tròbe pas la genciana dedins... Disen que ne'n i a mas bon... Çò qu'es plasent es de veire en gròssas letras de l'occitan sus 'queu paneu. Perque l'eslogan de 'quela marca es : Fai tot petar miladiu ! E que s'auva maitot dins la pub per la tele !

Tòrne de mas vacanças au País Basc. Un plan brave país, un retorn a la terra daus aujòus mairaus qu'eran dau Labord. 'Na terra plan descomplexada de sa lenga mai de sa cultura. 'Quela setmana, i a 'gut un acòrd entre Seaska e l'Educacion Nacionala : onze regents de mai per las ikastolak. Normau. N'i ne'n a quasi una per vilatge. E lo monde parlen basc dins las ruas, au subremerchat, au restaurant, … 'Laidonc, lo bilingüisme seriá possible en territòri jacobin ? Oc-es. Emb daus braves panues bilingües. Perque pas en cò nòstre ? Mas faudrá èsser tenace, perserverant... e parlar occitan, tot lo temps. Te, legidor, que me coneis dins la vita vertadiera, me parle pus en frances ! Benleu, nos faudrá nos forçar per zo far. Mas, los basques zo fan. E sem pas mai (ni mens) colhons qu'ilhs !!

Veiquí un pitit strip en occitan que lo Laurenç a fach per la Darboneta mai me... M'a plan far rire !!!!!!!!! Mas aura, me mesfiarai de las audencas mai de la Darboneta !!!!!!!!!

A Sant-Marcèl, las filhas polidas an pas de pel a l’uèlh...

Dins l'editoriau de la Setmana n°696, l'Andriu de Gavaudan nos balhet sa vuda sus los blògs occitans. Li voldriá rendre responsa perque lo trobei un pauc dur coma n'autres. Eu nos disset que mai d'un blòg occitan se barra dins sa p'ita nacion e nos tòrna vers l'eidéia de l'existéncia de las lengas d'òc.

Qu'es benleu lo cas de quauques blògs gascons. Quò mostra lo dinamisme dau mitan gasconista sus l'Internet. Veirem ben la quala de las doas opcions serà mai eficaça per la lenga e la cultura nòstras. Demai, beucòp de blògs aranes son virats vers l'Aran, la Catalonha mai l'Espanha sens sentiment panoccitan. Quò mostra que los aranes an benleu pas d'enguera consciéncia de lor apertenéncia ad un 'nivers culturau mai grand que lor vau. Quò me pareis normau perque Occitània es pas pro fòrta nimai presenta en Euròpa per los permetre de s'identificar ad ela. Quela identificacion a sa p'ita nacion, a son dialecte, la vese pas per d'autras regions occitanas. Los blògs lemosins, lengadocians o provençaus que coneisse son pas entau.

Eu nos disset tanben que los blogaires qu'aprenen la lenga van tròp regde. Quatre mots d'occitans lor son sufisents per far un blòg. Emai apòrten pas grand chausa, enoncien pas d'eidéia. De segur. Mas los blògs occitans son coma los dins las autras lengas dau monde : sierven d'en prumier de liam sociau dins 'na societat fòrça individualista. Son lo mejan d'expression daus dròlles dau monde per parlar d'amistat, d'amor, de ren d'important per los beus. Quantben de fòtos emb lo comentari « Té tro belle ma chéri, j'te kiffe grave !!!! » Coma los beus, trobem lo jornau intime public. La terapiá de grope virtuala. Qu'es quò l'essenciau daus blògs. N'i a tanben los blògs politics, propagandistas, de pensaments sus lo monde. N'i a pas tant. Los blògs coma los dau Bloguitge son entau. Mas an 'na caracteristica mai. Son suvent escrichs per de monde que mestrejen pas la lenga. Perque ? Perque aprener 'na lenga implica son usança e que l'Internet es un dau melhor mejan per trobar un interlocutor. La lenga d'òc es mens clandestina sus lo web que dins la vita vitanta. Abitant de Limòtges, utilize mai l'occitan sus Internet que non pas dins ma vita quotidiana. Qu'es pas 'cepte de parlar occitan dins lo quite mitan occitanista.

De segur, la lenga d'un aprenaire es pas perfacha. Nos fau corregir. Mas lo monde que coneisse, lo monde dau Bloguitge, son dau monde onestes, qu'an la volontat d'aprener la lenga per la far viure. Fau prener 'quilhs blògs coma un otis pedagogic, per de la gent qu'an pas beucòp d'autres mejans per utilizar los occitan.

Dissabdes, fuguei a la dictada occitana, coma beucòp de monde en Occitània mai en los País Catalans. Era la prumiera a Limòtges. Avem 'gut un texte de Roland Berland, un autor lemosin que me platz beucòp. Veiquí 'na pita video de França 3 Lemosin a perpaus de quel eveniment (los qu'an de bons uelhs nos poden veire, lo Tiston mai me).

A la fin de la dictada, chascun aguet un brave diplòma de participacion que se 'chaba entau : "Au nom de l'amistat entre nòstres país e per l'amor de nòstras lengas, li balham lo titol de Ciutadan d'Onor d'Occitània e de Catalonha." Oc-es, sei ciutadan d'onor !!! Sabe pas si quò permet de passar de las vacanças a gratis sus las costas catalanas...