Ieu maitot !!!!

Coma fòrça monde, serai a Carcassona dissabde que ven (oc-es qu'es deman...).

Char lector, benleu nos l'i veirem ! Per me coneisser qu'es plan simple : parle lemosin, sembla, segon ton passiu culturau a Asterix, José Bové o un tipe dau Village People (subretot emb lo casque de chantier, mas l'aurai pas, trabalhe pas las dimenjadas !!), portarai un brave chamison Arri ! roge jos mon pull.

Serai dins lo cortègi de Gardarem la Tèrra emb la fanfara daus Goulamas'K (e benleu un pauc emb la delegacion lemosina e 'nirai veire los pitits de Libertat). Serai coma la Clara de segur (si 'la part pas coma un daus musicians dau Goulamas'K, lo trompetaire/acordeonista per exemple...).

Me trobarà a la fin de la manifestacion a un taulhier d'un productor occitan a chantar "Anem Òc, per la biera occitana" o a lo de MXL87 (l'ai totjorn pas lo chamison banturle !!). E de ser, espere anar a Villagalhenc (char lector si t'as 'na veitura emb doas plaças voidas e que tòrna a Carcassona aprep la festa a Villagalhenc, vòle plan l'i 'nar coma te !!!)

(per los qu'aniran sus lo site d'Arri !, n'i a 'na fotò d'un tipe en chamison Arri ! roge... qu'es me...)

Trauchant la nuech, Super-Occitan, lo famós subre-eròs, tornet aparéisser dins un cafè limotjaud dissabde de ser. Defendent la lenga mespresada, Super-Occitan era vengut liberar Limòtges dau carcan franchimand per lo bilingüisme sinhaletic ! L'unica fòto dau subre-eròs fuguet presa per 'na jòuna femna tota desvirada.

'Ribant ni de çai, ni de lai, fugissent ne sai ente, Super-occitan es lo mistèri mager d'Occitània. Mas qui es Super-Occitan ? D'ente ven ? Serà a Carcassona ? Degun iò pòt dire...

Un pauc de pub per un grope de ska de Chartres (emai a l'entorn) ente juega lo cosin de ma mia : la Fanfa Skali (la Fanfa per los intimes). Lo cosin fai lo trombòne. Te perpause 'na p'ita video per lo descubrir. Bon, qu'es un pauc a la Mozinor lor video. Tu pòdes 'nar maitot sur lor Myspace.

Lo dissabde 3 d'octòbre 2009 a 21:00, Arri! te convida a 'na novela serada sus lo tema "Limòtges en occitan" au cafè L'Amicale des Parachutistes Belges, rua Charles Michels, a Limòtges.

'Quela serada marcarà la debuta d'una campanha per la sinhalizacion bilingüa Occitan/Francés dins la vila de Limòtges.

Quò sirà l'enchaison de bringar a l'occitana, en musica, de saborar de quauquas especialitats d'aquí, e d'aprener quauques mots dins la linga dau país.

La setmana passada, fuguei au concert dau Duo Gansch – Breinschmid a Limòtges. Un duò trompeta-contrabassa daus bons. 'Na musica jazzy, vienesa mais balcanica mas subretot daus musicians franc fadards ! Qu'era geniau !

Thomas Gansch nos aprenguei 'n'expression de chas se, dins son dialecte alemand d'Àustria : i schiff an Igl mit Dauerwelln. Qu'es 'n'expression d'utilizar quand tu ses susprés, estonat coma quand tu veses las p... euh... los pès de Melania per lo prumier còp, lo darrier chamison MXL87 o la darriera creacion de l'OCLC. La revirada en anglés facha per Georg Breinschmid es : I pee a hedgehog with longlasting waves. Quò balha en occitan : pisse un eiriçon emb una permanenta. Oc-es. Qu'es delicat, rafinat. Son entau los Vienés ! Ne'n fagueren 'na chançon, e vei-la-quí !

Crese que me la vau gardar 'quela expression. « Fuec de Diu ! Sei 'nat a un concert, ier, a ne'n pissar un eiriçon emb un permanenta ! » Qu'es çò qu'auriá pogut dire Coincoin, la canetona lemosina auboissaira, qu'es 'nat veire lo concert dau Mnozil Brass, ente juega Gansch (de legir son rendut-compte sus son blògue).

I a un an, lancei l'idéia dau Bloguitge sus lo Forum Occitània : un malhum de blògues occitans sus lo modele dau Freemen. Per far dau buzz occitan. Emai coneisser los autres blogaires occitans. En tut parlar de tot mai de ren en occitan. Sei pas si i a mai de buzz occitan sus lo web. Mas sei segur d'aver rescontrat dau monde. 'Laidonc, dedique a tots los amics blogaires un bocin de musica de Moussu T e lei jovents.

Per los amics e las amijas dau Bloguitge : Alecs, Axel, Anna, Camille, Faidit, Florenç, Focran, Gavach, eth Gat-Esquiro, Hlorenç, Jan-Peire, Joan-Francés, Joan deu Peiroton, Julien, Laurenç, Lutz, Marge, Marçau, Melania, Muriel, Olivier, l'Òmi, los de l’Ostau dau País Marselhés, Pons, Poyyât, Olivier, Roberta, Segalas-k, es Sindiquetes, Sòfia, Tam, Tony, Virginia, Yuji.

Emai los autres e las autras : Carme, Cyril mai sa loba, Danís, Farri, Jacme, Joan-Peire, Magalí, Merike, Paolo, Patricia, Sandrine, Tederic, Tiston, Tondo Rotondo.

Quand tu n'as que des bons amis

Vòle far un pauc de pub per un amic meu. Eu creet un webradio l'an passat : Jazz Clazzic. 'Na radio que passa nonmas dau swing, dau gospel mai dau blues. Mas, laisse Michel vos presentar sa radio.

Veiqui 'na brava 'ficha creada per lo Joan-Peire sus 'n'ideia soïssa. De difusir lo mai possible de segur !

'Na blogaira força coneguda m'a demandat de me marcar a 'na formacion (perque es 'na formacion ggeeenniiaaalllla... enfin, qu'es çò que ditz...) : la licéncia d'occitan per correspondéncia de l'universitat Paul Valéry de Montpelhier. Sabe que i a daus blogaires que l'i son marcats. Setz contents de 'quela formacion ? N'i pas tròp de trabalh per quauqu'un qu'a 'na vita professionala (lo prumier que me ditz qu'aurai lo temps perque trabalhe a l'equipament !!!!) ??? L'i vau o l'i vau pas ???

Char legidor italian, occitan d'Itàlia o viatjador que passariá per 'quela peninsula, t'infòrme de la surtida en Itàlia de Loudun, la BD de l'amic Paolo, chas Edizioni BD. Un plan brava BD que parla de çò que se passet a Loudun en 1634. Bon... qu'es pas un libre per los dròlles tot parier... Mas, qu'es istòric ! En França, era surtida chas Soleil.