Ieu maitot !!!!

En tut me permenar sus Lastfm , ai fach 'na descuberta de las bravas. Daus trobadors d'acier ! Nos venen d'Itàlia, de la famosas valadas occitanas. E... aime pas dau tot ! Mas, coma sei un garçon plan gente, e que quò plairá a mas legidoras, vos los presente. De qualas legidoras vòle parlar ? Mas de las fòrça simpaticas dròllas de l'Occitan Leopard Crew. De las dròllas que cosen, que bròchen, que bròden e... qu'escoten dau punk rock !!!

Veiqui dròllas ! Per v'autras ! 'Na video dau Quinse, los trobadors d'acier de las valadas ! E per telecharjar a gratis lor darrier (e benleu prumier) disc es aquí !!

'Na p'ita nhòrla en nòrd-occitan aupenc. Lo prupchen còp que fas tombar l'aiga, char legidor mascle, mesfia-te de la p'ita vielha !!!

Una pechona vielha chaminava per charrièra tirassant doas sachas de bordilha gròssas, una dins chasca man.

L'una de las sachas èra traucaa e, de temps en quora, un bilhet de cent euros se'n eschapava e tombava au mitan de la charrièra.

Veient aquò, un policier l'aresta e li dis :
- "O, Dòna, bilhets de cent euros tomban d'aquèla sacha !
- "Mercé de me'n avisar, dis la pechona vielha. Me chau tornar recuperar aquestos bilhets. Encara mercé !
- "Un momenton, pas tant lèu !" fai lo policier : "D'onte sortissetz tot aquest argent ? L'avetz volat ! ?
- "O non !" responde la pechona vielha. "Vaquí ! lo terren qu'es darrier l'ostau serve d'estacionament a l'estadi de foot e, chasque còp que se joa e que los espectators vòlon eschampar d'aiga davant de dintrar o en sortissent de l'estadi, s'arestan davant aquestos aubrilhons que bordan ma maison e eschampan d'aiga sus las flors qu'avieu semenaas. Alora, m'escondo darrier los aubrilhons amb un parèu de cisèus e chasque còp que quauqu'un sorte son instrument per eschampar d'aiga, li diso : Dona-me cent euros o te lo copo !
- "Es pas una marria idea, d'aquela !" dis lo policier. "Alora, bòn astre !... Mas, disetz-me... que i a dins l'autra sacha ?
- "A ben !" responde la vielha, "sabetz, paian pas totes !"

Tòrne de mas vacanças au País Basc. Un plan brave país, un retorn a la terra daus aujòus mairaus qu'eran dau Labord. 'Na terra plan descomplexada de sa lenga mai de sa cultura. 'Quela setmana, i a 'gut un acòrd entre Seaska e l'Educacion Nacionala : onze regents de mai per las ikastolak. Normau. N'i ne'n a quasi una per vilatge. E lo monde parlen basc dins las ruas, au subremerchat, au restaurant, … 'Laidonc, lo bilingüisme seriá possible en territòri jacobin ? Oc-es. Emb daus braves panues bilingües. Perque pas en cò nòstre ? Mas faudrá èsser tenace, perserverant... e parlar occitan, tot lo temps. Te, legidor, que me coneis dins la vita vertadiera, me parle pus en frances ! Benleu, nos faudrá nos forçar per zo far. Mas, los basques zo fan. E sem pas mai (ni mens) colhons qu'ilhs !!