Ieu maitot !!!!

Veiqui 'na version provençala mai decalada d'un estandard trad occitan : Diga Janeta per Laids Crétins des Alpes (plan v-òrres mai plan bestias !!!).

Legit sus lo blòg de Melania : Solidaritat emb los escolans de la Valadas occitanas d'Itàlia !!!

La posicion del Govèrn italian sus lhi contenguts de la reforma de l’escòla:

“Degun trucharè las pichotas escòlas de montanha, fòra que aquelas ambe menc de 50 escolars”.

La posicion de Lido Riba, President de L’UNCEM Piemont (Union Comunitats de Montanha dal Piemont):

“Lhi a 41 escòlas de montanha ambe menc de 12 escolars, que serèn destinaas a despareisser!!”

La posicion de Mercede Bresso (Presidènta Region Piemont) e de l’Assessora Regionala a l’istruccion Gianna Pentenero:

“Dins lo periòde brèu las escòlas de montanha serèn resparmiaa, mas après, ambe l’aplicacion del plan operatiu complèt, lhi aurè 180 Comunas piemontesas de montanha que perderen l’escòla maternala o elementara”

Fin finala, l’operacion portaré a la clausura de 220 escòlas de montanha sus las 260 que existon ara.

L’atac de la ministra Gelmini a l’escòla publica e, en particolar, a l’escòla de montanha es ben grèu. En aquest moment dificil per tota l’escòla italiana, mas sobretot per l’escòlas occitanas de las Valadas, chal far auvir nòstra vòutz, , per defendre la cultura e la civiltat alpina.

Lo 30 d’otobre tuchi a Coni a 9 oras dal matin en Plaça Europa ambe cartèls en lenga nòstra, nòstras bandieras e nòstra musica!!

Lo dissabdes 4 d'octòbre, n'i a 'gut la prumiera serada Arri ! dau monde. Fuguet un succes daus grands. Tot plen de monde son venguts a l'Amicale des Parachutistes Belges (oc-es, lo café ente fasiam nòstra festa se 'pela entau... quò fai long sus la pòrta...). Emai tot plen de monde plan coneguts !

I aviá un grand chabretaire lemosin, especialista dau tendilhon, un famós chamisonaire lemosin, exilhat a Tolosa, lo productor de la melhor biera occitana, lo presentador d'una emission occitana sus 'na radio de Limòtges escotada de pertot dins lo monde, un blogaire lengadocian, plan conegut, exilhat en Lemosin, mai... me !!!

Char legidor, te perpause un pitit juec : trobar totas 'quelas celebritats sus las fòtos de la serada (disponiblas sus lo site web d'Arri : http://arrilemosin.free.fr ). Te sufís de botar lo numero de la fòto ente tu creses aver trobar 'na celebritat de la serada. Ganharàs tota ma consideracion !!!

Dimecres, 'chabei un libre de Carles Camprós. Auve la Melania... Legisse d'enguera un vielh chause. E òc ! Qu'es entau, qu'es pas autrament. Un recuelh publicat en 1984 de novelas escrichas entre 1939 e 1949. Parlan dau país d'Usès, en Lengadòc. Lo país dau Carles. Un país rude, passionat. Un país d'amor, de colèra, de violéncia tragica. L'estile, lo ritme de la lenga de Camprós nos fan viure los sentiments de 'quelas femnas e 'quilhs òmes. De segur, nos parlan d'un monde rurau, emb sos còdis sociaus, desaparegut. Mas, chas n'autres, pòples latins e mediterraneus, la desesperança amorosa que nos mena a la folia es eternala.

N'i a quauquas setmanas, trobei un pitit libre sus lo taulier d'un editor audenc. Boris le babylonien contre l'Aligot Littéraire. La remembrença de l'aligòt minjat a l'Estivada 'queste estiu me faguet salivar. Virei lo libre per ne'n legir lo darrier. Un extrach. Dau ritme, de l'umor. Mas pas d'aligòt. L'autor, un jòune, coma me. Fuguet chaumaire. Coma me. Dreibei lo libre. Quauques mots d'occitan. Revirats en frances. Beucòp de frances. Daus còps revirats en òc. Un pitit glossari plan interessant. Mas totjorn pas d'aligòt !! Lo voliá trobar. 'Chaptei lo libre. Lo comencei de legir.

Un jòune autor occitan monta a París per trobar Boris, un exilhat, e li presentar un project fadard. Un Oulipo occitan : l'Aligòt Literari. « Qu'es aquò qu'aqueste aligòt ? L'Aligot Littéraire est une invention issue d'un concept très technique. Celui-ci mêle à une évolution linguistique une avancée poétique, entraînées et jugulées par des progrès éthyliques étonnants, ceci en simple application d'un process au marc de raisin fondu et, ce qui est vraiment nouveau : avec une pointe de gras ! » Vei-lo-quí ! L'aviá trobat mon aligòt !

Un occitan perdut dins la jungla literària parisenca, entre vodcà lituaniana, parpalh d'òtessas plan tetonadas, reviscoladors de la Gàllia Narbonesa e un exilhat aparisencat, que passa a la television e que tot lo monde tròban très beau. 'Na critica dau monde literari en França. Mas 'na critica facha dempuei Occitània. Emb una occitanitat sens complexe. Un libre qu'es, segurament, de l'aligòt literari, emb sa pointe de gras, e benleu un pauc autobiografic...

Julien Campredon, Boris le babylonien contre l'Aligot Littéraire, Atelier du Gué, Villelongue d'Aude, 2006.

Lo site de l'editor : http://www.atelierdugue.com

Veiquí lo clip de la chançon "Stereotype" daus Maurescas. Un pauc estatic per un grope de ragga... Mas, las paraulas son de las bonas !!!

Veiqui la banda anoncia dau melhor filme occitan de tots los temps (enfin... benleu...). Qu'es un sendareu-movie. Un concept occitan de segur. Mas bon, son pas 'ribats los pitits...